Чăваш Ен Президенчĕ Михаил Игнатьев Республика клиника онкологи диспансерĕн радиологи корпусĕн çум çуртне уçма хутшăннă. Учрежденире 99 тухтăр, медицина наукисен пĕр докторĕ тата 7 кандидачĕ, 208 вăтам сыпăкри медĕçчен тăрăшать. Диспансер вунă çула яхăн И.Н.Ульянов ячĕллĕ ЧПУ медицина факультечĕн онкологи кафедрин клиника бази шутланать.

- Чăваш Республики юлашки çулсенче халăха пысăк технологиллĕ медицина пулăшăвĕпе тивĕçтерес енĕпе малалла талпăнни савăнтарать, - тенĕ Президент хăйĕн сăмахĕнче. - Радиологи корпусĕн пристройне уçса медицина пулăшăвне лайăхлатас тĕлĕшпе тепĕр утăм турăмăр. Кунта пысăк квалификациллĕ тухтăрсемпе медсестрасем ĕçлеççĕ. Правительство сиплев тухăçлăхне ÿстерме тата ĕç условийĕсене лайăхлатма пур енлĕн тăрăшать.

Кăçалхи иккĕмĕш кварталта онкодиспансерĕн пысăк технологиллĕ медицина хатĕрĕсене вырнаçтарнă диагностика центрне юсаса çĕнетес ĕçе вĕçлеме палăртнă. 2011 çулта çĕнĕ хирурги корпусне тума тытăнмалла. Строительство ĕçĕсене 2013 çул тĕлне вĕçне çитерме йышăннă.

Президент брахитерапи, дозиметри планĕн, рентгенодиагностика, компьютер томографийĕн, УЗИ кабинечĕсен ĕç-хĕлĕпе, онкологи пулăшăвĕн 2010 çулхи статистика кăтартăвĕсемпе паллашнă. Республика пуçлăхĕ журналистсене компьютер томографийĕн тĕрĕслевĕ витĕр тухма сĕннĕ. Николай Зверев фотоăста эксперимента хутшăнма килĕшнĕ. Çапла майпа пурте çĕнĕ йышши оборудованин хăвăртлăхне тата тухăçлăхне хăйсем курса ĕненме пултарнă.

Кун хыççăн Михаил Игнатьев медицина пĕрлешĕвĕн представителĕсемпе тĕл пулнă, онкологи службин аталанăвĕн малашлăхĕпе çыхăннă ыйтусене пăхса тухнă.