Чăваш Республикинче «Сывлăх сыхлавĕ» наци проекчĕ туллин пурнăçланать. Унпа килĕшӳллĕн муниципаллă округсенче фельдшерпа акушер пункчĕсем çĕклеççĕ. Канаш тăрăхĕнче тӳрех виçĕ сиплев çурчĕ хута кайрĕ. Вĕсене уçма Çĕнĕ Шелттем, Сител, Малти Тукай ялĕсенче пурăнакансем хутшăнчĕç. Çĕнĕ фельдешрпа акушер пункчĕ – кашни ял илемĕ. Сарă тĕслĕ çурт аякранах курăнать, кунта пурăнакансене савăнтарать. Чи пĕлтерĕшли вара медицина пулăшăвĕ патне инçе каймалла мар, шур халатлă ĕçчен ялтах. Пĕр фельдшерпа акушер пунктне çĕклеме çичĕ миллион тенкĕ ытла тăкакланă.

Çуртра темиçе пӳлĕм – прививка тумалли,тĕрĕслемелли, çынсене йышăнмалли. Кунта çĕнĕ сĕтел-пукан, кирлĕ хатĕр-хĕтĕр, компьютер. Сиплев çуртне сывлăх енчен хавшак çынсем те чăрмавсăрах кĕме пултараççĕ. Çĕнĕ сыватмăшра ăшă, шыв юхса кĕмелли тата тухмалли пăрăхсем вырнаçтарнă. Пушар тухсан систерекен хатĕрпе тата видеосăнавпа тивĕçтернĕ. Канаш тăрăхĕнче 53 фельдшерпа акушер пункчĕ. Вĕсенчен 34-ĕшĕ – çĕнни. Çулталăк вĕçлениччен округра тата икĕ сиплев çурчĕ хута каймалла – Вырăскас Пикших тата Кивĕ Шелттем ялĕсенче.