Кану кунĕсем лăпкă иртмерĕç. Чӳк уйăхĕн 6-мĕшĕнче Чăваш Ен тĕп хулинче ирхине вут-çулăм тухнă. Шупашкарти Тăххăрмĕш пилĕк çуллăх проспектĕнче тăхăр хутлă çуртра «хĕрлĕ автан» ташланă. Пушар пĕр çын пурнăçне вăхăтсăр татнă. Медицина пулăшăвĕпе çичĕ çынна тивĕçтернĕ. Вĕсенчен пиллĕкĕшне халĕ сыватмăшра сиплеççĕ. Ку йышра икĕ ача. Васкавлă медицина пулăшăвĕн сыватмăшĕн пӳлĕмĕнче икĕ хĕрарăм. Хăйсем лăпкă пулсан та чунĕнче вĕсен çил-тăвăл алхасать тейĕн. Ĕнерхи кун вĕсемшĕн тĕлĕкри евĕрех.

– Эпир çывăрнă пулнă. Питĕ кăшкăраççĕ, шаккаççĕ. Шакканă, кăшкăрнăран вăранса кайрăм эпĕ. Вăранса кайрăм та – тĕтĕм кĕрет пӳрте, сывлама пулмасть. Кантăка уçса ятăм. Ăна уçмалла мар пулнă тет, эпир пĕлмерĕмĕр. Питĕ хытă хăрарăмăр. Аран антăм эпĕ. Пожарниксем алăран тытса антарчĕç. Çурăм тăрăх шыв юхать анчах, йĕп-йĕпе пулса. Васкавлă пулăшăва хурса çакăнта илсе килнĕшĕн тав вĕсене. Халĕ кинемей хăйне аванрах туять. Юн пусăмĕ аптратать ăна. Сыватмăшра унпа пĕрле виçĕ çын сипленет.

НАДЕЖДА СМЕЛОВА: «Вĕсене пурне те сĕрĕм тивнĕ. Икĕ хĕрарăм, пĕр арçын. Вĕсен пурнăçне халĕ хăрушлăх çук. Вĕсене эпир сиплетпĕр. Çывăх вăхăтра больницăран кăларатпăр». Пушарта шар курнă икĕ тĕпренчĕке вара республикăри ача-пăча клиника сыватмăшĕнче сиплеççĕ.

ВИТАЛИНА ПРОКОПЬЕВА: «Тухтăрсемпе пăхнă. Кирлĕ сиплеве пĕтĕмпех панă. Тата Мускаври тухтăрсемпе консультаци панă. Мускаврисем пире пĕтĕмпех тĕрĕсех сиплетĕр тесе ярса панă. Паянлăха икĕ ачин пурнăçĕ валли те нимĕнле хăрушлăх та çук». Вут-çулăмпа кĕрешме 30 ытла çăлавçă хутшăннă, 11 техникăна явăçтарнă. Пушарта 22 çынна эвакуациленĕ. Саккăрмĕш хутри икĕ пӳлĕмлĕ хваттерте «хĕрлĕ автан» ташланин сăлтавне халĕ тĕпчеççĕ.